TOKHA LIVE
काठमाडौँ, १५ कार्तिकः
नेवार समुदायकी अग्रणी महिला धिमे बाजाकी मैचा इन्दिरा लाछिमस्युको जीवनकथामा आधारित चलचित्र ‘इन्दिरा धिमे मैंचा’ शनिबारदेखि राजधानीका विभिन्न हलहरूमा प्रदर्शनमा आएको छ।
नेपालभाषामा ‘मैंचा’ शब्दको अर्थ ‘छोरी’ हो ।यही शब्दले चलचित्रको मर्म झल्काउँछ। सन् १९९४ सालतिर जब समाजमा “महिलाले बाजा बजाउन हुँदैन” भन्ने सोच गढिएको थियो, त्यही समयमा ११ वर्षकी सानी इन्दिराले परम्परागत सोचको जरो हल्लाउँदै धिमे बाजा समाएकी थिइन्। यही साहस र विद्रोहको आत्मा यस चलचित्रको केन्द्रमा रहेको छ।
विश्वज्योति सिनेमाज र कीर्तिपुर सिनेप्लेक्समा पहिलो प्रदर्शन भएको चलचित्रमा इन्दिराको बाल्यकालदेखि आजसम्मको जीवनयात्रा मार्मिक रूपमा प्रस्तुत गरिएको छ। चलचित्रले नौबाजा र धिमे बाजाको संरक्षण, र यस क्षेत्रको सांस्कृतिक निरन्तरतामा इन्दिराको योगदानलाई भावनात्मक रूपमा चित्रण गर्छ।
चलचित्रमा रोजीना सुवालले इन्दिराको मुख्य भूमिका निर्वाह गरेकी छन् भने सिम्रिक श्रेष्ठले युवा इन्दिराको रूप भरेकी छन्। साथै रामराजा भाम, देवचन्द्र बज्राचार्य, रूपेन्द्र श्रेष्ठ, नगिना जोशी, मदनकृष्ण श्रेष्ठ लगायतका कलाकारहरूको अभिनय देख्न सकिन्छ।
निर्देशन सुरेन्द्र तुलाधरले गरेका छन्। सङ्गीतमा निल शाक्य, संयोजनमा फिरोज बज्राचार्य, कोरियोग्राफीमा रोहिया महर्जन, र छायाङ्कनमा मुकेश हुमागाईं रहेका छन्।
बिके फिल्म्सद्वारा निर्माण गरिएको यस चलचित्रका मुख्य निर्माता गोपालकृष्ण महर्जन हुन् भने सहनिर्मातामा सुरेन्द्र शाक्य, गोपालकाजी कायस्थ र गोविन्द महर्जन छन्।
‘इन्दिरा धिमे मैंचा’ केवल एक चलचित्र होइन । यो एक महिलाको साहस, सांस्कृतिक पहिचान र परम्परा तोड्ने हिम्मतको कथा हो। यसले समाजमा महिलाको भूमिकाबारे सोच्न प्रेरणा दिने र दर्शकको हृदय छुने विश्वास गरिएको छ।
इन्दिरा धिमे मैंचाको टिजर:
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
