TOKHA LIVE
मंसिर ३०, २०७७ मंगलवार
वासिंटन डीसी ।नवनिर्वाचित अमेरिकी उपराष्ट्रपति कमला ह्यारिसका पति डग एमह्याफले ह्यारिस ह्वाइट हाउसमा रहँदा पनि युनिभर्सिटीमा पढाउने भएका छन् । वासिंटन डिसीमा रहेको जर्जटाउन युनिभर्सिटीको ल स्कुलमा उनले पढाउने काम स्वीकार गरेका छन् ।
उनले आफू जर्जटाउन कम्युनिटीमा आवद्ध हुन पाएकोमा निकै खुशी व्यक्त गरेका छन् । उनले त्यहाँ मनोरञ्जन र मिडिया कानुनका बारेमा अध्यापन गराउनेछन् । उनले वकिलका रुपमा भने काम गर्न छाड्नेछन् । आफ्नो ३० बर्षे करिअरमा उनले बौद्धिक सम्पत्ति, मिडिया र मनोरञ्जनसम्बन्धि कानुनमा विज्ञता हासिल गरेका छन् ।
त्यस्तै नवनिर्वाचित अमेरिकी राष्ट्रपति जो बाइडेनकी पत्नी जिल बाइडेनले प्रथम महिला भएपनि आफ्नो शिक्षण पेशा जारी राख्ने बताइसकेकी छिन् । यसो भएमा जिल बाइडेन ह्वाइटहाउसबाहिर तलबी काम जारी राख्ने अहिलेसम्मकै एकमात्र प्रथम महिला हुनेछन् ।
डाक्टर जिल बाइडेन नर्थन भर्जिनिया कम्युनिटी कलेजमा पूर्णकालिन अँग्रेजी प्राध्यापक हुन् । उनले एक अन्तरवार्तामा प्रथम महिला भएपनि आफ्नो अध्यापन पेशा भने जारी राख्ने बताएकी थिइन् । उनले आफू ह्वाइटहाउसमा रहँदा पनि पढाउने काम नछाड्ने बताएकी थिइन् ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
