काठमाडौँ, २९ जेठः चलचित्र विधाबाट काठमाडौँ महानगरपालिका र सङ्गीत विधाबाट ललितपुर महानगरपालिका युनेस्कोको रचनात्मक सहर सञ्जालमा सदस्य बनेका छन् । काठमाडौँ उपत्यकाका स्थानीय तहमध्ये काठमाडौँ महानगरपालिका चलचित्र विधाबाट र ललितपुर महानगरपालिका सङ्गीत विधाबाट युनेस्कोको रचनात्मक सहर सञ्जालमा सदस्य बनेपछि स्थानीय तहसँगै युनेस्को, ब्रिटिस काउन्सिल, एफसीए, आइएलओसहित निकाय तथा कार्यालय र रचनात्मक क्षेत्रसँग आवद्ध व्यक्तिहरूले संयुक्त प्रयास थालेका हुन् । रचनात्मक उद्योगको विकास र विस्तारका लागि कल्चरल एण्ड क्रिएटिभ इन्डष्ट्रिज फ्रेन्डस ग्रुप (फर सिसीआई) निर्माण गरेर आपसी अभ्यास, ज्ञान, सीप अनुभव आदानप्रदान गर्न थालिएको कामपाका कार्यवाहक नगरप्रमुख सुनिता डङ्गोलले जानकारी दिनुभयो ।
यसको पहिलो बैठक ललितपुर महानगरपालिकाले आयोजना गरेको थियो । काठमाडौँ महानगरपालिकाका कार्यवाहक प्रमुख डङ्गोलको अध्यक्षतामा दोस्रो बैठक सम्पन्न भएको छ । बैठकमा आफूले चयन गरेको विधा र यसअन्तर्गत सम्पन्न कामका विषयमा जानकारी गराउने क्रममा कामपाका कार्यवाहक प्रमुख डङ्गोलले, चलचित्र विधाले रचनात्मक उद्योगका अरु विधालाई चलचित्रबाट समेट्न सकिने र समुदायस्तरमा रचनात्मक अर्थतन्त्रलाई चलायमान बनाउन सकिने भएकाले काठमाडौँले चलचित्र विधा चयन गरेको बताउनुभयो । उहाँका अनुसार काठमाडौँका समुदायभित्र लुकेका कथालाई चलचित्रको कथामार्फत पात्रसँग जोड्न सकिने, काठमाडौँलाई खुला स्टुडियोका रूपमा विकास गर्न सकिन्छ ।
“सार्वजनिकस्थलमा सामाजिक, सांस्कृतिक तथा पारिवारिक विषयमा आधारित चलचित्र प्रदर्शन गरेर समुदायलाई यसप्रति रुचि जगाउनु, चलचित्र संवाद गर्नु, शिक्षा, सूचना र सन्देशका विषय जोड्नु यसका मुख्य क्रियाकलाप हुन्”, प्रमुख डङ्गोलले भन्नुभयो, “यसले चलचित्रमा निर्माता, निर्देशक, कथाकारसँग समुदायको सम्बन्ध स्थापित गरेर उत्पादनस्थल उपलब्ध गराउनु र समुदायमा आय वृद्धि गराउनु र जनहितअनुसार नतिजा प्राप्त गर्नु रहेका छन् । समुदायमा भएका तर आयआर्जन हुन नसकिरहेका क्षेत्रलाई आयसँग जोडेर तथा यससँग सम्बन्धित कर प्रणालीलाई सहज बनाएर सहजीकरणको काम गर्दैछौँ”, उहाँले भन्नुभयो । ललितपुर महानगरपालिकाका प्रमुख चिरीबाबु महर्जनले महानगरले सङ्गीत विधाबाट युनेस्को क्रिएटिभ सिटीज नेटवर्कमा सदस्यता प्राप्त गरेको जनाउँदै यसलाई समुदायस्तरमा अभ्यास बढाउने तथा अन्तरराष्ट्रियस्तरमा परिचित गराउने कामसँग सम्बन्धित प्राथमिक योजना रहेको बताउनुभयो । रचनात्मक अर्थतन्त्र, दिगो विकासको प्रवर्द्धन, रोजगारी सृजना, अन्तरसम्बन्ध विकास, सहयोग र साझेदारी विस्तारका लागि स्थानीय सरकार र अन्तरराष्ट्रिय संस्थाहरूको साझा मञ्चका रूपमा यो समूहलाई अगाडि बढाउन खोजिएको उहाँको भनाइ छ ।
