TOKHA LIVE
बालेनलाई भावी प्रधानमन्त्रीका रूपमा अघि सार्ने समझदारी
काठमाडौं, १३ पुस / राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका मेयर बालेन्द्र शाह (बालेन)बीच ७ बुँदे सहमति पत्रमा हस्ताक्षर भएको छ। सहमतिअनुसार बालेन शाहलाई भावी प्रधानमन्त्रीको रूपमा अघि सार्ने र पार्टी सभापतिका रूपमा रवि लामिछाने नै रहने समझदारी भएको छ।
देशमा सुशासन, सामाजिक न्याय र समतामूलक विकासको साझा लक्ष्य बोकेका दुई नेताबीच भएको यो सहमतिलाई आगामी राजनीतिक सहकार्यतर्फको महत्वपूर्ण कदमका रूपमा हेरिएको छ। सहमति पत्रमा लामिछाने र शाह दुवैले हस्ताक्षर गरेका छन्।
सहमति पत्रमा बहुलवादी लोकतान्त्रिक प्रणालीभित्र रहेर उदार अर्थतन्त्र, असल शासन र नागरिकका आकांक्षा पूरा गर्न परिवर्तनकामी तथा सुसंस्कृत राजनीतिक शक्तिहरूबीच सहकार्य आवश्यक रहेको उल्लेख छ।
त्यस्तै, २०८२ साल भदौ २३ र २४ मा भएको जेन–जी आन्दोलनसहित विभिन्न कालखण्डका जनआन्दोलनमा शहीद तथा घाइते भएका नागरिकहरूको बलिदानलाई प्रेरणाको स्रोत मानेर अगाडि बढ्ने प्रतिबद्धता व्यक्त गरिएको छ।
समान सोच, समान अठोट र राष्ट्रसेवाको साझा लक्ष्यसहित राष्ट्रिय स्वतन्त्र पार्टी र बालेन्द्र शाहबीच भएको यो सहमतिलाई आगामी दिनमा नयाँ राजनीतिक दिशाको संकेतका रूपमा लिइएको छ।
रवि लामिछाने , राष्ट्रिय स्वतन्त्र पार्टी (पहिलो पक्ष) र बालेन्द्र शाह (दोश्रो पक्ष) बीच बिच भएको सहमति।
१. नवयुवाहरुले भ्रष्टाचार र कुशासन विरुद्ध गरेको आन्दोलनको अपनत्व लिंई, घाईते तथा शहिद परिवारका मागहरुको यथोचित सम्वोधन गर्ने प्रतिवद्वता जनाउँने,
२. समुन्नति र सामाजिक न्यायका राष्ट्रिय उद्देश्यहरुका लागि गरिनु पर्ने गहिरा नीतिगत, संस्थागत एवं संरचनात्मक सुधारहरु मार्फत आर्थिक-सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम-आय भएको राष्ट्र बनाउने मार्गचित्रको इमान्दार कार्यान्वयनप्रति समर्पित हुने,
३. पहिलो पक्ष र दोश्रो पक्षबीच बृहत् एकता भए पश्चात् स्थापित हुने राजनीतिक दलको नाम ‘राष्ट्रिय स्वतन्त्र पार्टी, दलको झण्डा साविककै निलो पृष्ठभूमिको मध्य भागमा सेतो रङ्गको गोलाकार बीचमा निलो रङ्गको घण्टीको आकृति, दलको चुनाव चिन्ह ‘घण्टी र केन्द्रीय कार्यालय काठमाडौँ उपत्यकामा रहने,
४. राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने,
५. बृहत् एकता पश्चात् पार्टीको संगठनात्मक संरचनालाई थप सक्षम र फराकिलो बनाउन युवा अभियन्ता एवं अनुभवी विज्ञहरुलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने,
६. आसन्न आमनिर्वाचन लगत्तै यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने,
७. राष्ट्रिय स्वतन्त्र पार्टीको सिद्धान्त, नेतृत्व र चुनाव चिन्ह ‘घण्टी’ मा गोलबद्ध भइ लोकतान्त्रिक सुशासन, समुन्नति र सामाजिक न्यायका मुद्धा अघि बढाउन अन्य सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिहरुलाई आव्हान गर्ने।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
