ज्यापु दिवसमा सहभागी हुन प्रमलाई ‘ग्वय्दां’सहित निमन्त्रणा

काठमाडौं ९ मंसिर /२२ औं राष्ट्रिय ज्यापु दिवसमा प्रमुख आतिथ्यताका लागि प्रधानमन्त्री सुशिला कार्कीलाई सोमवार बिहान ‘ग्वय्दा’ (परम्परागत निमन्त्रणा) प्रदान गरिएको छ। २२ औं राष्ट्रिय ज्यापु दिवस समारोह समिति २०८२ का संयोजक नरः कोता त्वाःको संयोजनमा बाजागाजाका साथ प्रधानमन्त्री निवास बालुवाटारमा पुगेर ग्वय्दा प्रदान गरिएको हो।

ग्वय्दां ग्रहण गरेपछि संक्षिप्त सम्बोधन गर्दै प्रधानमन्त्री कार्कीले नेवार समाज संस्कृतिको क्षेत्रमा अत्यन्त धनी भएको र नेपालको पहिचानको रुपमा नेवार संस्कृतिलाई देखाउँदै आएको बताउनु भयो। उहाँले यही आउँदो मंसिर १८ गते राष्ट्रिय ज्यापु दिवसको कार्यक्रममा आफू सहभागी हुने पनि सो अवसरमा बताउनु भयो ।

ज्यापु संस्कृति विकास कोषको आयोजनामा वि.सं. २०६१ सालदेखि मंसिर शुक्ल पूर्णिमा (धान्य पूर्णिमा) को दिनलाई ज्यापु दिवसको रुपमा मनाउँदै आएको छ। कोषका अध्यक्ष मंगलकृष्ण सिंहले प्रम कार्कीलाई ग्वदां प्रदान गर्नुभएको थियो ।

ग्वय्दां प्रदान गर्नका लागि कोषका उपाध्यक्ष सन्त कुमार महर्जन, सल्लाहकारहरु सन्तु महर्जन, प्रचण्डमान बज्राचार्य, ज्यापु महागुथि नेपाःका अध्यक्ष सत्यनारायण डंगोल, कामपा ५ वडाका अध्यक्ष वीरेन्द्र प्रजापति, कामपा ८ वडाका अध्यक्ष आशामान संगतका साथै नरः (हाडीगाउँ) का बासिन्दाहरुको सहभागिता रहेको थियो ।