TOKHA LIVE
नविना श्रेष्ठ
मङ्सिर ०९/२०८२
बनेपामा रहेको बेलर स्काउट टुप (Troop) ले ६ महिनाको अवधिमा सञ्चालन गरिएको प्रथम तह (Membership Badge) तालिम सफलतापूर्वक सम्पन्न भएको छ। टुपकाे पहिलो दिक्षान्त समारोह भव्य रूपमा आयोजना गरेको छ। तालिम पूरा गरेका नव–दिक्षित स्काउट भाइबहिनीहरूको औपचारिक स्वागत साथै सम्मानसमेत गरिएको यस समारोहले टुपको नेतृत्व, अनुशासन तथा समुदाय सेवाप्रति समर्पणलाई अझ सुदृढ बनाएको आयोजकले जनाएको छ।
दिक्षान्त समारोह प्रतिज्ञा ग्रहण, स्कार्फ वितरण तथा प्रेरणादायी सम्बोधनसहित सम्पन्न भएको थियो। कार्यक्रमका माध्यमबाट नव–दिक्षित स्काउटहरूलाई जिम्मेवारी, सेवा भावना र संगठनात्मक मूल्यप्रति समर्पित रहन प्रोत्साहन गरिएको छ। समारोहका प्रमुख अतिथि बनेपा नगरपालिकाकी उपप्रमुख बिमला सापकोटा दाहाल, साथै स्काउट काभ्रे तदर्थ समिति संयोजक मोहन गोपाल श्रेष्ठ, केन्द्रीय स्काउट कार्यालय बनेपा संयोजक पुकार कर्णजित, राष्ट्रिय सहायक प्रशिक्षक सबुता महर्जन, एडभान्स नबिना श्रेष्ठ, तथा विद्यालयका प्रधानाध्यापक इन्दु थापा अतिथिको रूपमा उपस्थित हुनुभएको थियाे।
बनेपा नगरपालिकामा जति पनि विद्यालयहरू छन् ती सबै विद्यालयहरूमा स्काउट सञ्चालन गरी विद्यार्थी भाइबहिनीहरूलाई आत्मनिर्भर अनुशासन नेतृत्वदायी सामाजिक उत्तरदायित्व राष्ट्रप्रेमी समाजप्रेमी विद्यार्थीहरू उत्पादन गर्ने उद्देश्यले प्रत्येक विद्यालयमा स्काउट सञ्चालन गर्ने बनेपाका उपमेयर बिमला सापकोटा दाहालले बताएकी छिन् ।
कार्यक्रमको सञ्चालन सेकेण्डरी इन्चार्ज संजित श्रेष्ठले गर्नुभएको हाे। समारोह सफलतापूर्वक सम्पन्न भएसँगै स्काउट टुप बनेपाले आगामी दिनमा अझ प्रभावकारी रूपमा विद्यार्थीहरूलाई नेतृत्व, अनुशासन र सामाजिक उत्तरदायित्वका क्षेत्रमा सक्रिय बनाउने प्रतिबद्धता व्यक्त गरेको छ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
