काठमाडौँ, १९ असोजः पछिल्ला दुई दिनयता देशका विभिन्न स्थानमा आएको बाढी, पहिरो, चट्याङ र सवारी दुर्घटनाजस्ता विपद्का घटनाले ठूलो जनधनको क्षति पुर्याएको छ । सशस्त्र प्रहरी बल नेपालका अनुसार यी घटनामा परी ४० जनाको मृत्यु, ११ जना बेपत्ता र १३ जना घाइते भएका छन् ।
सबैभन्दा बढी क्षति इलाम जिल्लामा भएको सशस्त्र प्रहरी बलका सहप्रवक्ता शैलेन्द्र थापाले जानकारी दिनुभयो । इलाममा मात्रै बाढीपहिरोका कारण २८ जनाको मृत्यु र दुई जना गम्भीर घाइते भएका छन् ।
जिल्लागत विवरणअनुसार —
- सूर्योदय नगरपालिका : ५ जना
- इलाम नगरपालिका : ६ जना
- देउमाई नगरपालिका : २ जना
- फाकफोकथुम गाउँपालिका : १ जना
- माङ्सेबुङ गाउँपालिका : ३ जना
- माइजोगमाई गाउँपालिका : ८ जना
- सन्दकपुर गाउँपालिका : ३ जनाको मृत्यु भएको छ ।
त्यसैगरी, बाढीपहिरोका कारण
- उदयपुरमा २,
- रौतहटमा ३,
- रसुवामा ४ र
- काठमाडौँमा १ जना को ज्यान गएको छ ।
यता खोटाङ, भोजपुर, रौतहट र मकवानपुरमा चट्याङ लागेर ८ जना घाइते भएका छन् ।
त्यस्तै, पाँचथरमा भएको सवारी दुर्घटनामा ६ जनाको मृत्यु र ६ जना घाइते भएको सशस्त्र प्रहरीले जनाएको छ ।
उद्धार टोलीले बेपत्ता भएकाको खोजी कार्य जारी राखेको र मौसम सुधारसँगै राहत तथा उद्धार कार्यलाई थप तीव्र बनाइएको छ ।
