TOKHA LIVE
काठमाडौं । बुढानीलकण्ठ नगरपालिकाले रसुवाका बाढी तथा विपद् प्रभावितका लागि राहत सामग्री पठाएको छ। नगरपालिकाका विभिन्न वडा कार्यालय तथा स्थानीय समुदायबाट संकलन गरिएका राहत सामग्री बोकेका तीनवटा गाडी रसुवाको धुञ्चेतर्फ प्रस्थान गरेका हुन्।
वडा नं. ३ का अध्यक्ष आकाश धिताल र वडा सदस्य विकास तामाङको नेतृत्वमा राहत सामग्रीसहितका गाडी रसुवातर्फ पठाइएको हो। राहत सामग्रीमा दाल, चामल, सिरक, डसना, सिरानी, सोलार चार्जर, लत्ताकपडालगायत विपद् प्रभावित परिवारलाई आवश्यक पर्ने सामग्री रहेका छन्।
संकलित राहत सामग्री गोसाइँकुण्ड गाउँपालिकाका जनप्रतिनिधिलाई हस्तान्तरण गरिने जनाइएको छ। बाढी तथा पहिरोका कारण प्रभावित बनेका परिवारलाई तत्काल आवश्यक सामग्री उपलब्ध गराउने उद्देश्यले राहत संकलन गरी पठाइएको नगरपालिकाले जनाएको छ।
स्थानीय समुदाय तथा विभिन्न वडा कार्यालयको सहकार्यमा संकलन गरिएको राहतले विपद्का कारण दैनिक जीवन प्रभावित भएका परिवारलाई केही राहत पुग्ने अपेक्षा गरिएको छ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
