काठमाडौं । रसुवामा आएको विनाशकारी बाढीबाट प्रभावित नागरिकको पीडामा साथ दिँदै सपनतीर्थ बहुउद्देश्यीय सहकारी संस्था लिमिटेड, टोखाले प्रधानमन्त्री दैवी प्रकोप राहत कोषमा १० लाख ३६ हजार रुपैयाँ सहयोग गरेको छ। बाढीबाट प्रभावित परिवारको राहत तथा पुनःस्थापनामा सहयोग पुगोस् भन्ने उद्देश्यले संस्थाले उक्त रकमको चेक शिक्षामन्त्री सस्मित पोखरेललाई हस्तान्तरण गरेको हो। चेक हस्तान्तरण कार्यक्रममा सपनतीर्थ बहुउद्देश्यीय सहकारी संस्था लिमिटेडका अध्यक्ष वसन्त श्रेष्ठ, सल्लाहकार चोकी हेरकाजी महर्जन डंगोल तथा संस्थाका शेयर सदस्यहरूको सहभागिता रहेको थियो। रसुवा बाढीका कारण धेरै परिवार दुःख, पीडा र अनिश्चितताको सामना गरिरहेका बेला सहकारीले आफ्नो सामाजिक उत्तरदायित्व सम्झँदै सहयोगको हात अघि बढाएको हो। संस्थाको यो सहयोगले विपद्मा परेका नागरिकको राहत तथा पुनःस्थापनामा केही भए पनि टेवा पुग्ने विश्वास गरिएको छ। सपनतीर्थ बहुउद्देश्यीय सहकारी संस्था लिमिटेडले वित्तीय सेवासँगै सामाजिक सद्भाव, मानवीय सहयोग तथा समुदायमुखी विभिन्न गतिविधि गर्दै आएको छ। विपद्का बेला पीडितको साथमा उभिनु पनि संस्थाको सामाजिक उत्तरदायित्वको महत्वपूर्ण हिस्सा रहेको संस्थाले जनाएको छ।
