खेतीको मौसम सुरु हुँदै, संसदमा रासायनिक मलको व्यवस्था गर्न सांसदहरुको माग

काठमाडौँ, ३० वैशाखः प्रतिनिधिसभाको मंगलबारको बैठकमा सांसदहरूले किसानलाई समयमै रासायनिक मल उपलब्ध गराउन सरकारको ध्यानाकर्षण गराएका छन्।

शून्य समयमा बोल्दै सांसदहरूले खेतीपातीको मुख्य मौसम सुरु हुन लागेकाले किसानले मल अभाव झेल्नुपरेको भन्दै तत्काल आवश्यक व्यवस्था गर्न माग गरेका हुन्।

सांसद  विक्रम खनालले किसानले मल नपाउँदा साहुसँग ब्याजमा ऋण लिएर खेती गर्न बाध्य भएको बताउनुभयो। उहाँले सरकारले किसानलाई सहज रूपमा मल उपलब्ध गराउन विशेष पहल गर्नुपर्नेमा जोड दिनुभयो।

यस्तै, सांसद सुनिल केसीले आवश्यक मात्रामा रासायनिक मल समयमै उपलब्ध गराउन माग गर्नुभयो।

बैठकमा कृषि, सडक, स्वास्थ्य, शिक्षा, पर्यटन, खानेपानी, निजी क्षेत्र, विश्व सम्पदा संरक्षण तथा सुकुमवासी व्यवस्थापनलगायत विषयमा पनि सांसदहरूले सरकारको ध्यानाकर्षण गराएका थिए।

सांसदहरूले कर्णाली राजमार्गको सुरक्षा, गौतमबुद्ध अन्तर्राष्ट्रिय विमानस्थल सञ्चालन, तराई–मधेसको खानेपानी समस्या, नर्सहरूको न्यूनतम पारिश्रमिक, चिया निर्यात, वन्यजन्तु आक्रमण, सुकुमवासी बस्तीको समस्या तथा शिक्षा विधेयकलाई अघि बढाउनुपर्ने विषय उठाएका थिए।

त्यस्तै, निजी क्षेत्रलाई लगानीमैत्री वातावरण आवश्यक रहेको, ग्रामीण क्षेत्र खाली हुँदै गएको तथा प्राकृतिक विपद् रोकथाममा सरकार गम्भीर हुनुपर्ने आवाज पनि संसदमा उठाइएको छ।