TOKHA LIVE
काठमाडौँ, ११ वैशाख : नेपाल मेडिकल काउन्सिलले एकै पटक १७ जना चिकित्सकको दर्ता प्रमाणपत्र (लाइसेन्स) खारेज गरेको छ।
काउन्सिलका रजिष्ट्रार डा सतिशकुमार देवका अनुसार नेपाली नागरिकता परित्याग गरी विदेशी राहदानी लिएका चिकित्सकहरूको लाइसेन्स खारेज गरिएको हो। यससँगै उनीहरूको नाम काउन्सिलको आधिकारिक दर्ता किताबबाट समेत हटाइएको छ।
काउन्सिलले नेपाल मेडिकल काउन्सिल ऐन २०२०, नियमावली २०२४ तथा नेपाल नागरिकता ऐन २०६३अनुसार यस्तो निर्णय गरिएको जनाएको छ।
लाइसेन्स खारेज हुने चिकित्सकहरूमा डा शर्मिला गुरुङ, डा रोशन भुसाल, डा मोती गुरुङ, डा देवराज रेग्मी, डा मेरिना गुरुङ, डा नीरञ्जनदेव पाण्डे, डा रोजन केसी, डा ममता गुरुङ, डा राजीव हमाल, डा सलुजा सिंह थारु लगायत छन्।
यसैगरी डा सुजना केसी, डा जोस्ना शाही, डा मनिषा हमाल, डा सुप्रिया शाक्य, डा इच्छा न्यौपाने, डा दीपेन ढकाल र डा तुसार सरवजना पनि समावेश छन्।
काउन्सिलका अनुसार ती चिकित्सकहरूले बेलायत, अमेरिका, पोर्चुगल, क्यानडा, भारत, अष्ट्रेलिया र हङकङलगायत देशको नागरिकता लिएका छन्।
यो निर्णयले विदेशी नागरिकता लिने नेपाली चिकित्सकहरूको पेशागत दर्तामा कडा कानुनी प्रावधान लागू भएको स्पष्ट संकेत दिएको छ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
