TOKHA LIVE
काठमाडौँ, २३ फागुनः गत भदौमा भएको जेनजी आन्दोलनपछि गठन भएको सरकारले छोटो समयमा निर्वाचन सम्पन्न गर्ने महत्वपूर्ण जिम्मेवारी पूरा गरेको छ। गृहमन्त्री ओमप्रकाश अर्यालले शुक्रबार भनिन्, “नागरिक सरकारले प्रमुख अभिभारा पूरा गरेको छ, अब नयाँ सरकारलाई जिम्मेवारी हस्तान्तरण गर्न आतुर छौँ।”
जेनजी आन्दोलनका क्रममा कैदी फरार र हातहतियार लुटिनुजस्ता सुरक्षा चुनौतीका बाबजुद सरकारले समयमै शान्तिपूर्ण निर्वाचन सम्पन्न गराएको गृहमन्त्री अर्यालको भनाइ छ। निर्वाचनपछि दिनभर उहाँले शुभकामना र बधाईका फोन तथा सन्देशहरू प्राप्त गर्नुभयो।
अन्तर्वार्तामा अर्यालले प्रधानमन्त्री सुशीला कार्कीप्रति विशेष आभार व्यक्त गर्दै गृहसचिव, मन्त्रालयका महाशाखा प्रमुख र सुरक्षा निकायका उच्च अधिकारीलाई धन्यवाद दिनुभयो। उहाँले भन्नुभयो, “निजामति प्रशासनको साथमा मात्र काम सफल हुन्छ; खाली नेतृत्वको आलोचना गर्नु पर्याप्त होइन।”
अर्यालका अनुसार, गृहमन्त्रालयले ‘पावर एक्सरसाइज’ होइन, शान्ति र स्थिरतामा केन्द्रित भूमिका निर्वाह गरेको छ। देशभर एकै चरणमा मतदान सम्पन्न भएको र केही क्षेत्रको नतिजा पनि आएको छ।
उहाँले निर्वाचनलाई संविधान कार्यान्वयन र जनताले प्राप्त गरेको हक अधिकारको संस्थागत प्रक्रिया भन्दै, “मतदानमा देखिएको उत्साह र सक्रिय सहभागिताले लोकतन्त्रप्रति जनताको अटल प्रतिबद्धता देखाउँछ,” भन्नुभयो।
गृहमन्त्री अर्यालले सुरक्षा चुनौतीलाई नजिकबाट नियालेर व्यवस्थापन गरिएको र सामूहिक निर्णय प्रक्रियाबाट काम गरिएको जानकारी दिनुभयो। गत पुसमा मधेशमा देखिएका केही साम्प्रदायिक हिंसाका घटना समयमै समाधान भएकोले निर्वाचनको माहोल सुरक्षित रह्यो।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
