TOKHA LIVE
काठमाडौँ, ४ फागुन /जाडोको स्याँठिलो रात, तर श्रद्धा र विश्वासको तापले राजधानीको पशुपतिनाथ मन्दिर क्षेत्र उज्यालो र उत्साहले भरिएको देखिन्थ्यो। बिजुली बत्तीले झिलिमिली बनेको मन्दिर परिसरमा भक्तजनको भीड रातभर घटेन, बरु बढिरह्यो।
महाशिवरात्रिका अवसरमा सूर्यास्तपछि सुरु भएको चार प्रहरको विशेष पूजा आज बिहान ६ बजेअघि सम्पन्न भएको पशुपति क्षेत्र विकास कोषले जनाएको छ। यस वर्ष रातभर मूलढोका खुला राखिएको थियो, किनकि ढोकाबाहिरसम्म भक्तजनको लाम कायमै थियो। लाखौँ श्रद्धालुले पूजा, आराधना र दर्शन गरी पर्व मनाए।
गोकर्णेश्वरमा पनि उस्तै आस्था
गोकर्णेश्वर महादेव मन्दिरमा पनि रातिसम्म भक्तजनको भीड लाग्यो। श्रीयन्त्र र बालयन्त्र पूजाको शास्त्रीय मान्यताअनुसार पशुपतिनाथ आएका धेरै भक्तजन यहाँ पनि पुगेका थिए। भीडका कारण जम्मा भएको फोहर आज बिहान सफाइ गरिने जनाइएको छ।
नागेश्वर र बाणेश्वरमा रातभर दर्शन
गोठाटारस्थित नागेश्वर महादेव मन्दिरमा बिहान ३ बजेदेखि नै लाम लागेको थियो। छ जना ब्राह्मणद्वारा चारै प्रहर पूजा र रुद्राभिषेक सम्पन्न गरियो। मन्दिर व्यवस्थापन समितिका अध्यक्ष प्रकाशजङग रायमाझीका अनुसार हजारौँ भक्तजनले दिनभरि तथा रातिसम्म दर्शन गरे। बाणेश्वर र अन्य शिवालयहरूमा पनि उस्तै श्रद्धालुहरूको उपस्थिति देखियो।
मध्यरातमा पर्ने फागुन कृष्ण चतुर्दशीका दिन मनाइने महाशिवरात्रि पर्वले यस वर्ष पनि भक्तजनको अटुट आस्था र विश्वासलाई फेरि एकपटक उजागर गरेको छ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
