TOKHA LIVE
काठमाडौँ, २७ मङ्सिर
लुम्बिनी लायन्सले उत्कृष्ट प्रदर्शन गर्दै नेपाल प्रिमियर लिग (एनपिएल)को दोस्रो संस्करणको उपाधि हात पारेको छ। कीर्तिपुरस्थित त्रिवि अन्तरराष्ट्रिय क्रिकेट रङ्गशालामा आज सम्पन्न फाइनल खेलमा लुम्बिनीले सुदूरपश्चिम रोयल्सलाई छ विकेटले पराजित गर्दै ऐतिहासिक जित दर्ता गर्यो।
गत संस्करणमा उपविजेतामै सीमित सुदूरपश्चिम यसपटक पनि उपाधिबाट एक कदम टाढा रह्यो। लुम्बिनीले उपाधिसँगै एक करोड १० लाख रुपैयाँ पुरस्कार प्राप्त गर्दा उपविजेता सुदूरपश्चिमले ५१ लाख रुपैयाँमा चित्त बुझायो।
८६ रनको सामान्य लक्ष्य पछ्याएको लुम्बिनीले नौ ओभरमै चार विकेट गुमाउँदै लक्ष्य पूरा गर्यो। जितका नायक दिनेश अधिकारी बने। उनले मात्र १३ बलमा एक चौका र पाँच छक्काको मद्दतले आक्रामक ४२ रन जोड्दै दर्शकलाई रोमाञ्चित बनाए। डार्शी शर्टले १४, कप्तान रोहित पौडेलले १६ र निरोशन डिक्वेलले अविजित ११ रनको योगदान दिए।
यसअघि टस जितेर ब्याटिङ गरेको सुदूरपश्चिम १९.१ ओभरमै ८५ रनमा समेटिएको थियो। इशान पाण्डेले धैर्यका साथ ५१ बल खेल्दै सर्वाधिक ३३ रन बनाए। कप्तान दिपेन्द्रसिंह ऐरीले १३ तथा हरमीत सिंह र स्कट कुगेलिइनले १०–१० रन जोडे।
लुम्बिनीका बलरहरूले सुदूरपश्चिमको ब्याटिङ लाइनलाई दबाबमा राखे। शेर मल्ल, रुबेन ट्रम्पेलमान र कप्तान रोहित पौडेलले समान तीन–तीन विकेट लिए भने टीका भण्डारीले एक विकेट हात पारे।
सन्तुलित टोली प्रदर्शन र आत्मविश्वासपूर्ण खेलका साथ लुम्बिनी लायन्सले एनपिएलको दोस्रो संस्करणमा आफूलाई च्याम्पियनको रूपमा स्थापित गर्न सफल भयो।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
