TOKHA LIVE
पाटन (ललितपुर), १२ मङ्सिर /
ललितपुर महानगरपालिकाका प्रमुख चिरीबाबु महर्जनले नेपाः भाषा संरक्षणका लागि आधुनिक सूचना प्रविधिको प्रभावकारी उपयोग गर्न आग्रह गरेका छन्। नेपाः भाषा मंका खलःका १४औँ अधिवेशनबाट निर्वाचित नयाँ नेतृत्वलाई शुभकामना दिँदै आयोजित कार्यक्रममा उनले भाषा र संस्कृतिको जगेर्ना महानगरको प्राथमिकता रहेको बताए।
महर्जनका अनुसार प्रविधि तीव्र गतिमा अघि बढिरहेको यस समयमा नेपाः भाषाको प्रवर्द्धनलाई पनि प्रविधिमै जोडिनु आवश्यक छ।
“मंका खलःले भाषा संस्कृतिका विज्ञहरूलाई छनोट गर्दै योजनाबद्ध रूपमा अघि बढ्नुपर्छ। नेपाः भाषाको संरक्षण र विकासका लागि महानगर जे–जति आवश्यक पर्छ, सहयोग गर्न तयार छ,”– उनले भने। “बजेट अभाव हुन दिनेछैनौँ, प्रविधिमार्फत भाषा प्रवर्द्धनका प्रभावकारी कदम चाल्न अब ढिलाइ गर्नुहुन्न।”
कार्यक्रममा मंका खलःका अध्यक्ष महेन्द्रलाल महर्जनले पछिल्ला वर्षहरूमा नेपाः भाषाको प्रयोग घट्दै गएको चिन्ता व्यक्त गरे। भाषाको भविष्य सुरक्षित राख्न परिवारबाटै यसको प्रयोग बढाउनुपर्ने उनको सुझाव थियो। उनले लोकसेवा आयोगको परीक्षामा नेवारी भाषा समावेश गराउन प्रयास गर्ने बताउँदै यसका लागि महानगरसहित सबै सरोकारवालाको साथ आवश्यक रहेको उल्लेख गरे।
महानगर उपप्रमुख मञ्जली शाक्य बज्राचार्यले नेपाः भाषा मंका खलःले नेवारी भाषा र संस्कृतिको संरक्षणमा महत्वपूर्ण योगदान दिँदै आएको बताइन्। स्थानीय पाठ्यक्रममा नेवारी भाषा समावेश गरेर महानगरले गरेको पहलले भाषा संरक्षणको कामलाई थप बल मिलेको उनको भनाइ थियो।
उहाँका अनुसार नेवारी भाषा लोप हुने अवस्थामा पुगेकाले भाषा, लिपि र सांस्कृतिक पहिचान जोगाउन देश–विदेशका नेवारी समुदाय एकताबद्ध हुन जरुरी छ। समग्रमा, सबै वक्ताहरूको अभिमत एउटै थियो। नेपाः भाषा र संस्कृतिको संरक्षण केवल प्रतिबद्धताले मात्र होइन, समयअनुसार प्रविधिसँग हातेमालो गरेरै सम्भव हुन्छ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
