काठमाडौं ८ पौष । बाल प्रेमी क्लबको सहयोगमा टाेखा संस्कृति सम्पदा संरक्षण दबुको आयोजनामा संस्कृति संरक्षित क्षेत्र रहेको ऐतिहासिक बस्ती टाेखा नगरपालिका वडा २ र ३ मा यहि पौष १० गते सम्पदा दिवस थिल्ला पुन्ही ( य:मरी पुन्हि ) को अवसरमा त्य:छीं त्य: ज्याझ्व: सांस्कृतिक कार्यक्रम आयोजना हुने भएको छ। त्य:छीं त्य: ज्याझ्व: सांस्कृतिक कार्यक्रम विगत वर्षहरुमा जस्तै यसपटक पनि टाेखा नगरपालिका वडा २ हासल देखि शुरु भएर उक्त कार्यक्रम सरस्वती चौर,क्वने लाछी हुँदै थनेलाछी दबुमा विभिन्न कलाकारहरुद्वारा नृत्य सांस्कृतिक प्रदर्शन गर्दै मौलिक त्य:छीं त्य: ज्याझ्व:लाई जोगाउनु हुन आयोजकले टाेखा नगरवासी माझ आव्हान गर्नुभयो । टाेखा संस्कृति सम्पदा संरक्षण दबुका केन्द्रिय अध्यक्ष मनिराज डंगोलले नेवार समुदायले नयाँ धान भित्र्याएको खुसीयालीमा धान राख्ने भकारी वा कोठीमा पनि पूजा आराधना गरेर हर्षोल्लासका साथ योमरी पूर्णिमा मनाइने गरेको बताउदै आफन्त छोरि चेलीबेटी र छर छिमेकीलाई ख्वाउने लगायत तिल र चाकु भरिएको योमरी सगुनका रुपमा उपहार पठाउने चलन पनि रहेको बताए।

 संस्कृति सम्पदा संरक्षण दबु टाेखा कच्चाका अध्यक्ष हरिदास श्रेष्ठले योमरी पुन्हिको अवसरमा त्य:छीं त्य: कार्यक्रम निरन्तर संचालन भै रहने बताउदै अबका दिनमा पनि यस्तै साथ र सहयोग रहने छ भन्ने भरोसाका साथ कार्यक्रमलाई सफलपार्न सहयोग गर्नुहुन सम्पुर्ण संघसंस्था टाेखा नगरवासीलाई हार्दिक अनुरोध गर्नुभयो ।