TOKHA LIVE
काठमाडौँ, ११ भदौ ।
विघ्नहर्ता भगवान् गणेशको जन्मोत्सवका रूपमा मनाइने गणेश चतुर्थी (चथाः) पर्व आज देशभर उल्लासका साथ मनाइँदैछ। भाद्र शुक्ल चतुर्थीका दिन भगवान् गणेशको जन्म भएको मानिने भएकाले यो दिन विशेष धार्मिक महत्व बोकेको छ।
आज बिहानैदेखि काठमाडौं उपत्यकाका प्रमुख गणेश मन्दिरहरू—अशोकविनायक, चन्द्रविनायक, सूर्यविनायक, कमलविनायक, कमलादी गणेशलगायतका मन्दिरहरूमा भक्तजनहरूको घुइँचो लागेको छ। विशेषगरी चाबहिलस्थित अशोकविनायकमा भक्तजनको ठूलो लर्को देखिएको छ।
धर्मशास्त्रविद्हरूका अनुसार हरितालिका तीजको व्रत पारायण गरी गणेशको पूजा आराधना गर्ने विधि प्रचलनमा छ। सुखी दाम्पत्य जीवन र विघ्न नआओस् भन्ने कामनासहित भक्तजनहरूले गणेशको पूजा गर्ने चलन रहेको छ।
नेवार समुदायमा यस दिन बालबालिकालाई ‘छुस्यामुस्या’ बाँड्ने परम्परा विशेष मानिन्छ, जसले बालबालिकाको हर्षोल्लास बढाउँछ। विसं २०६५ देखि गणेश चतुर्थीको भोलिपल्ट राजधानीलगायत प्रमुख शहरहरूमा गणेश रथयात्रा गर्ने परम्परा पनि सुरु भएको छ, जसले यो पर्वलाई अझ भव्य र सामूहिक बनाएको छ।
यसै दिन विसं २०६४ मा राष्ट्रिय धर्मसभा स्थापना भएकोले आज धर्मसभाको स्थापना दिवसका रूपमा पनि स्मरण गरिन्छ।
मन्दिर क्षेत्रमा भक्तजनहरूको भीड सहज बनाउन विशेष सुरक्षा व्यवस्था मिलाइएको छ। गणेश चतुर्थीले धार्मिक आस्था मात्र होइन, सामाजिक र सांस्कृतिक एकतालाई पनि झल्काउने गरेको छ।
अध्यक्ष प्रकाशक तथा सम्पादक
सानुराज डंगोल
सूचना विभाग दर्ता प्रमाण पत्र नं- २३६५/
०७७-७८
